Intempéries : levée de la vigilance orange en Haute-Corse
(A redazzioni d'Alta Frequenza) - A prifittura di Corsica Suprana faci sapè chì Météo France hà publicatu un avisu novu è u nivellu di vigilenza hè dunqua statu calatu à u nivellu giallu pà a Corsica Suprana. Di fattu, i venti sò divintati irregulari è passani di manera prugressiva in u settori punenti meziornu punenti. I marosuli sò menu impurtanti dinò. Pà ciò chì tocca l'episodiu di timpesta, 372 parsunali (Gendarmeria, SDIS, DDSP, DMD, BA 126 è CRS) sò stati mubilizati pà gistiscia ss'evenimentu climaticu. Par avà, ùn c'hè nisun vittima. 38 parsoni sò stati succorsi cù elicotteri. 292 parsoni sò stati missi in securità (100 chì erani in un camping in Aleria è 80 chì stavani in un hôtel di a cumuna di Penta di Casinca). Cuncirnendu u statu di i stradi : annant'à a strada dipartimintali 62 (Oletta) : ùn c'hè più piena ma a strada ferma taghjata. A strada tarrituriali 10 (Aleria) hè sarrata à a circulazioni, listessa pà a strada di a Canonica. A strada hè securizata da i servizi di pulizza, à partasi di Furiani è di a gendarmeria, in Biguglia. A circulazioni di i treni hè taghjata ma un sistema di bus hè statu missu in ballu pà traspurtà i passaghjeri. 4000 casi sò stati privi d'elettricità ma a situazioni duvaria vultà à a nurmalità di manera sana ind'a nuttata. U trafficu marittimu è u trafficu aereu sò vultati à a nurmali dinò. I venti di settori punenti à meziornu punenti sarani abbastanza forti ma ùn ghjustificheghjani più a vigilenza aranciu. U mantenimentu di a vigilenza aranciu pà u fenomenu marosuli-summersioni ùn hè più ghjustificatu. Di pettu à a situazioni attuali, u centru uparaziunali dipartimintali chì era statu missu in ballu in a Prifittura hè statu chjosu à quattru ori è quartu. I servizi fermani quantunqua mublizati pà a seguita di l'episodiu.
Sur le même sujet
