Intemperies en Corse : le point sur la situation

(A redazzioni d'Alta Frequenza) - Dopu à l'episodiu di ventu è di timpurali chì hà toccu a Corsica, a Prifittura dà un bilanciu. U tettu di una casa hè statu cacciatu nant'à a cumuna di Coti Chjavari. U merri di a cumuna hà fattu pighjà in carica a famighja è l'hà mandata ind'un antru alloghju. Par avà, u gattivu tempu hà fattu nisun vittima. A circulazioni hè stata disturbata duranti un mumentu nant'à a reta stradali sicundaria par via d'arburi chì sò falati nantu : RD 81 : trà Piana è Portu ; RD 83 : settori di Santa Maria è Sichè; RD 70 : settori di Sagone. U serviziu di l'infrastrutturi stradali di u cunsighju ghjinirali di Corsica Suttana hà missu tuttu in opara pà arrigulà a situazioni à lestra. Ssi settori sò in traccia d'essa trattati : RD 55 : settori Sponda Meziornu (piaghja d'argentu); RD 420 : settori d'Auddè. Arburi sò dinò falati nant'à a strada ind'u settori d'Aiacciu. Un affari chì hà inghjinnatu disguasti matiriali nant'à vitturi o circulazioni taghjata, u tempu di l'intarvinzioni di i servizii tennichi di a cità d'Aiacciu. Altri settori sò stati tocchi dinò, com'è Purtivechju, Carbuccia, Coghja è Bastelica. U trafficu aereu hè statu disturbatu duranti u dopu meziornu. Certi buli sò stati annulati : Aiacciu-Nizza (annulatu), Nizza-Aiacciu (annulatu); Parighji-Aiacciu (mandatu in Bastia); Aiacciu-Parighji (annulatu); Nizza-Figari (annulatu); Marseghja-Figari (annulatu); Figari-Marseghja (annulatu). Disturbi dinò prisenti ind'i trasporti marittimi Corsica Ferries Experss ; partenza rimandata à dumani 8 ori di sera ; Annulazioni di u viaghju Aiacciu-Tulò chì era privistu di parta stasera à 8 ori cù u Mega, Mega Express 4 : ghjunta privista in Aiacciu dumani matina à 8 ori mantinuta; SNCM  : partenza di u Jean Nicoli mantinuta à 7 ori di sera pà u viaghju Aiacciu-Marseghja. Infini nant'à a reta elettrica è cumunicazioni, ùn ci hè nulla di particulari par avà. Pà ciò chì tocca i valori arrighjistrati : ventu : 160 chilometri par ora in Sponde (1980 m d'altitudini); 150 chilometri par ora in Capicorsu; 140 chilometri par ora in Capu Sagru; 135 chilometri par ora in L'Isula; 127 chilometri par ora ind'a Parata; 115 chilometri par ora ind'a Chjappa, 110 chilometri par ora in Bucugnà (1019 m d'altitudini). Acquati forti : 22 mm in Aiacciu, 44 mm in Sampolu; 50 mm in Ocana, 51 mm in Rennu, 71 mm in Bucugnà, 88 mm in Verghju. Evuluzioni privista : u puntu u più altu di l'avenimentu sarà trà u principiu di a sirata è a mità di a nuttata. I venti certi volti forti à viulenti fermani ghjiniralizati à una maiò parti di l'isula fin'è a prima parti di a notti di dumenica à luni. I settori i più sposti sarani : u Meziornu Livanti di a Corsica, trà Purtivechju è Bunifaziu, è i zoni di rilievu. I buffulati sarani u più suventi trà 100 è 120 chilometri par ora, fin'è 140 à 170 chilometri par ora in Capicorsu. In altrò, i buffulati sarani piuttostu trà 80 è 100 chilometri par ora. In prima parti di notti, da u Nordu di l'isula, i venti andarani di manera viulenti ver di u settori Nordu, certi volti assai forti, particularmenti trà Scandula è Capicorsu passendu pà a Balagna. I buffulati sarani trà 100 è 110 chilometri par ora.