Intempéries en Corse : le point ce mardi matin
(A redazzioni d'Alta Frequenza) - U puntu ssu marti da mani nant’à u gattivu tempu di a sirata è di a nuttata. In Corsica Suttana prima, u matrali di u Rizzanesi ùn hà più distribuitu currenti elettricu à mezanotti. U ponti d’Arena Bianca hè statu summersu, cù 5 parsoni missi in securità par via di a cullata in furia di l’acqua. A Zona Industriali di Tavaria hè stata inundata, trè parsoni chì erani in un bungalow sò stati missi in securità è cummerci numarosi ani cunnisciutu disguasti impurtantissimi par via di l’acqua. Par avà, i succorsi rializeghjani missioni di ricunniscenza è di pumpami nant’à tutti i settori. Da un’antra banda, a strada tarrituriali 40 trà Sartè è Prupià hè sarrata, a Gendarmeria riteni i camiò in Cavru è in Pianottuli. In Corsica Suprana, a strada tarrituriali 10 trà Bastia è Bunifaziu hè tagliata à u nivellu di u meziornu d’Aleria, à a surtita d’A Ghisunaccia è in Vicchisi. Una siconda strada hè stata aparta in Aleria. Infini, i municipalità d’Aiacciu è di Bastia ani dicisu di sarrà i marcati di Natali pà privenzioni, fin’è a fini di u risicu. A Prifittura di Corsica dumanda di limità à u più i spiazzamenti è di rispittà i deviazioni è i cunsigni di i forzi di l’ordini, di succorsi è di l’agenti di i cullittività par ùn diragnà micca i succorsi è l’intarvinzioni nant’à u tarrenu, è soprattuttu par ùn mettasi micca in periculu.
Sur le même sujet
