Le Direct

Intempéries en Corse-du-Sud : le point en fin de journée

(A redazzioni d'Alta Frequenza) - U dipartimentu di Corsica Suttana hè sempri in vigilenza aranciu, pà u risicu d'acquati è di timpurali. Quissa quì hè stata prulungata fin'è dumani matina (marcuri) 10 ori. U Meziornu Stremu hè stata a zona a più tocca di u dipartimentu. U CD di Borivoli (surtita nordu ind'u settori di Purtivechju), a strada dipartimintali 59 (paisolu di Mela, settori di Sotta), a strada dipartimintali 659 (settori di Purtivechju, ponti di l'Arca), è u CD 17 (settori di Purtivechju ver di u Belvedere) sò riaparti à a circulazioni. Guasgi 800 clienti sò stati privi d'elettricità (Zonza è Sartè soprattuttu), un ritornu à a nurmali hè privistu pà u principiu di a sirata. Disturbi nant'à a reta telefonica fissa è mubili sò censati nant'à u settori di Tizzanu, duva un'intarvinzioni hè in corsu. L'alimentazioni in acqua bona hè stata rimissi ind'u paisolu di Mela. Acquati forti sò aspittati in siconda parti di notti, in certi lochi 100 à 120 mm, più particularmenti nant'à u latu à livanti di u dipartimentu. Di pettu à issi cundizioni meteurulogichi pessimi, a più grandi prudenza hè racumandata.