Inondations en Sardaigne: la solidarité s'organise en Corse
(A redazzioni d'Alta Frequenza) - Dopu à l'inundazioni dramatichi chì ani toccu u nordu di a Sardegna, a Camara righjunali d'agricultura hà dicisu d'ingaghjà si à prò di i parsoni cuncirnati. Metti in piazza una racolta di prudutti di prima nicissità è di matiriali è prudutti agriculi pà i pruduttori sardi. Pà l'aiuti agriculi di manera più pricisa, pudeti chjamà u 06 23 70 25 58 o u 06 15 97 30 66. A sulidarità s'urganizeghja in Bunifaziu è Purtivechju cù a missa in ballu di parechji punti di racolta. In Bunifaziu, hè nant'à u portu chì si faci a racolta di cuverti, vistiti caldi, scarpi è panni di casa pà i chjuchi è i maiò. In Purtivechju, a Croci rossa hà stallatu in parechji lochi di a cità punti di culletta pà i listessi prudutti è urni pà racoglia soldi. Eppo a Cità d'Aiacciu susteni a Pruvincia di Gallura. U merri d'Aiacciu, u duttori Simon Renucci, hà chjamatu u merri d'Olbia, Gianni Giovannelli, pà fà li sapè a sulidarità di a Cità d'Aiacciu è pà cunnoscia i bisogni di a pupulazioni. Pà risponda u meghju pussibuli à l'urghjenza di a situazioni, Simon Renucci hà prupostu un aiutu finanziariu è tennicu. Ferma dinò in rilazioni stretta cù l'associu Sardu d'Aiacciu Su Nuraghe. I mudalità di a participazioni di a Cità sarani aduttati duranti u cunsighju municipali di ssu marcuri 27 di nuvembri è cumunicati appena più tardi.
