Incidents après SC Bastia - OM : le point complet
(A redazzioni d'Alta Frequenza) - Una dumenica abbastanza disturbata dopu à l’incidenti di ssu sabbatu nanzi è dopu à a partita di u SC Bastia contr’à Marseghja, induva vicinu à u stadiu, i forzi di l’ordini è più di centu sustenidori di u Sporting si sò battuti. Mentri chì un sciffru di quaranta quattru feriti ind’è i pulizzeri è i gendarmi hè statu ammintatu da u ministeru di l’Internu, solu ottu di ssi quaranta quattru CRS o gendarmi mubili feriti sò andati à l’uspidali pà calchì ora pà pudè trattà picculi prublemi di sonu à l’arechji dopu à a splusioni di fulgani, l’altri suffrendu solu di picculi lesioni. Cundannati da u ministru di l’Internu, a ministra di i Sports è a LFP, ss’incidenti ani da inghjinnà una riunioni da quì à calchì ghjornu trà ssi trè parti, i ministri aspittendu dighjà chì a LFP tiressi tutti i cunsiquenzi di ss’incidenti, vali à dì sanzioni contr’à u SC Bastia. U club, ghjustu appuntu, s’hè difesu, dicendu chì i cunsigni prifitturali erani stati appiecati da u club à centu par centu, chì a securisazioni di i ghjucadori di Marseghja s’era passata com’è privista, è chì u club ùn pudaria essa rispunsevuli d’incidenti chì sò accaduti fora di u stadiu, insistendu annant’à l’intarvinzioni di a securità di u club annant’à a via publica pà cuntena ss’incidenti, ciò chì u club ùn hè micca ubligatu à fà. Ferma chì oghji, sanzioni impurtanti sò pussibuli contr’à u Sporting, com’è contr’à certi prutagunisti, a LFP avendu dumandatu seguiti penali numinativi.
Sur le même sujet
