Importante saisie d'armes à Ajaccio
(A redazzioni d'Alta Frequenza) - Parechji armi sò stati trovi oghji (marcuri) in Aiacciu. I servizii di pulizza ani rializatu una parquisizioni, viali Mont Thabor. Ani trovu più di una quarantina d'armi chì sariani à un ritiratu di 57 anni. In fatti, i servizii inchiestadori avariani ripighjatu in manu un cartulari ghjudiziariu da cuntinenti. Quissu quì trattava di una parsona cumprendu parechji armi nant'à internet. Ricullendu u filu di i compri, i pulizzeri sò ghjunti à truvà iss'armi quì, cù 20 armi di spalla, 2 pistoli à mitraglia (sten), è 20 pistoli. L'omu arristatu hè par avà in guardia custodia. Da nutà chì un'antra parquisizioni saria in corsu ind'una casa vicinu à Aiacciu, sempri ind'u quadru di u stessu affari. Tutti l'armi viaghjani, a parsona missa in guardia custodia hè scunniscuta di i servizii di pulizza. L'armi sarani quantunqua asaminati via una spertizia balistica. Da u cantu di u cummissariatu d'Aiacciu, si pensa malgradu tuttu à a tesi di una parsona fendu a cullezzioni d'armi, ancu puru s'è nisuna via hè schisata.
Sur le même sujet
