Le Direct

Hôpital de Castellucciu : les services d'oncologie et de radiothérapie temporairement fermés suite à un piratage informatique

Luni, u sistema infurmaticu di u spidali di u Castillucciu hè statu attaccatu da un ransomware chjamatu Vice Society. Vali à dì chì u sistema hè oramai stantaratu. Da libarà lu, o si paga un riscattu à i pirati infurmatichi, o si spera di rimetta lu in istatu.

I cunsiquenzi ci sò, à nantu à u funziunamentu llu stabilimentu. À senta ni à l’ARS, da pudè guaranzì a sicurità è a qualità di i presi in carica, à u stabilimentu l’hè tuccata à attimpà l’attività di radiotirapia è d’uncolugia, chì par quissi u sistema d’infurmazioni conta à veru.
Ugnunu hè mubilizatu da urganizà a cuntinuvità di i trattamenta impurtanti.
L’aienti sò stati infurmati individualmenti.

A cuntinuvità di i presi in carica hè assicurata pà a psichiatria, a cura cuntinuva è a riadattazioni.

Sò stati missi in anda azzioni, da limità a stesa d’issu ransomware : l’accessu à u sistema d’infurmazioni è à internet hè statu taddatu. Tutti i posti di travaddu sò stati scunnetti. Una ceddula di crisi, in leia cù l’ARS, hè stata missa in anda. Tuttu hè fattu da ritruvà, à u più prestu, un funziunamentu nurmali è sicurizatu di l’attività.