Haute-Corse : les soldats du feu toujours en alerte
(A redazzioni d'Alta Frequenza) - I suldati di u focu sò mubilizati più cà mai in Corsica Suprana, cù quatordeci sinistri arrighjistrati dipoi ssu marcuri à mezanotti. U più impurtanti, in Barbaghju in Nebbiu, hà distruttu 45 ettari di vegetazioni è cresci sempri ; mezi umani numarosi, ma dinò dui Canadair è un avviò Dash agiscini da u celu. In Erbaghjolu, una superficia di 9 ettari hè stata parcorsa da i fiari, cù un focu accesu in parechji parti ; hè oramai ammaistratu grazia à l'intarvinzioni di dui Tracker, di dui Canadair, di un elicotteru chì lampava l'acqua è di parsunali nant'à u tarrenu. Sempri in u Curtinesi, cinqui fochi sò stati censati in u Poghju di Venacu, cù in tuttu 2 ettari di vegetazioni partuti in fumu è quì torna a mubilisazioni di mezi umani è aerei. Altri fochi, cù superficii menu impurtanti, ani dumandatu l'intarvinzioni di spinghjifochi è di militari, in Corti, Favalellu o ancu Prunelli di Fium'Orbu. (ritrattu : Marie Youbi)
