Haute-Corse : le point sur les intempéries et les perturbations
(A redazzioni d'Alta Frequenza) - In Corsica Suprana, a situazioni inghijnnata da u gattivu tempu si migliureghja à pocu à pocu. S'ella c'hè sempri a vigilenza aranciu fin'è ssa dumenica à 6 ori di mani, pari ch'ellu sighi passatu u più grossu, ancu s'è l'acquati duvariani essa torna putenti dopu meziornu. Và meghju annant'à i stradi par asempiu, postu chì dopu à a RN193 arisera, hè a RN 198 chì hè stata riaparta trà Corti è Aleria. I stradi dipartimintali fermani tagliati pà certi lochi. Stanotti, parsoni chì ani cunnisciutu i cunsiquenzi annant'à a strada sò stati allughjati. 150 culleghjenti ani passatu a nuttata in u culleghju di Montesoru postu ch'elli ùn pudiani micca entra in casa soia. Automobilisti ani passatu dinò elli a nuttata in u centru culturali di Biguglia dopu avè lacatu a so vittura annant'à a strada naziunali à u mumentu u più forti di u gattivu tempu. A prudenza devi essa torna prisenti pà ssi stradi. Da un'antra banda, u trenu ùn pò più viaghjà à u nivellu di Biguglia è sarà u casu fin'è a fin di a matinata à u minimu.
Sur le même sujet
