Le Direct

Ghjurnate di Corti 2017 : Corsica Libera favorable à l'union aux territoriales dès le 1er tour

(A redazzioni d'Alta Frequenza) - I Ghjurnati Internaziunali di Corti si sò compii ssa dumenica à sera in a citadella di a capitali storica di a Corsica. Si trattava di a prima edizioni senza u presidenti emblematicu di l'Associu Sulidarità, Ghjuvan Maria Poli, sparitu di ghjinnaghju scorsu è chì hà ricivutu un umaghju putenti ssa dumenica in fin di ghjurnata. Altru umaghju, quillu in mimoria di Jean Charles Albertini, militanti naziunalistu mortu d'una manera tragica in a nuttata trà sabbatu è dumenica. L'evenimentu hà adunitu torna dilegazioni internaziunali numarosi ; vultaremi nant'à ssu latu pricisu ind'i nostri nutiziali chì venini. Ssa dumenica, u dibattitu tradiziunali nant'à a situazioni pulitica di l'isula, nanzi à u famosu meeting di chjusura di Corsica Libera, t'avia pà titulu, com'è annu « Guvernu corsu : custruimu a Nazione », cù prisenti à a tribuna i membri principali di a maghjurità tarrituriali eppo i trè diputati naziunalisti. Aldilà di u bilanciu dopu à 18 mesi di mandatura, a dumanda impurtantissima chì ogni militanti naziunalistu, ma micca solu, si poni hè quissa quì : a dimarchja d'unioni trà Femu a Corsica è Corsica Libera, Pè a Corsica, partinariatu chì si devi scriva in u tempu, sarà prulungata o micca à partasi da u prima ghjiru di i tarrituriali di u mesi di dicembri ? S'è l'affari ùn sò ancu dicisi soca ind'è l'autunumisti, pà l'indipendentisti ssa strategia hè a bona.

Steti à senta à Ghjuvan Guidu Talamoni.