Fortes précipitations dans l'Extrême-Sud : le point sur la situation
(A redazzioni d'Alta Frequenza) - L'acquati forti chì toccani dipoi arimani (marti) una bella parti di a Corsica Suttana ani inghjinnatu parechji prublemi, soprattuttu dipoi stamani. U rughjoni u più toccu hè quillu di u meziornu stremu, duva i succorsi ani dighjà rializatu numarosi intarvinzioni, missi in securità di parsoni bluccati in vittura chì, malgradu a cullata di l'acqua, ani presi stradi sicundarii. Paisoli com'è Muratellu, Arca, San Ciprianu o Pinarellu frà altru sò impussibuli d'accessu, mentri chì a strada naziunali 198 trà a surtita nordu di Purtivechju è A Sulinzara hè sarrata. Hè dunqua cunsighjatu di pighjà a vittura solu in casu di necessità strema, è duva a circulazioni hè pussibuli. I culleghjenti devini firmà ind'u so stabilimentu, nisun trasportu sculari pudendu viaghjà par via di u gattivu tempu. Una cellula di crisa hè stata missa in piazza da u cantu di a casa cumuna di Purtivechju chì gistisci a situazioni. U tempu si duvaria calmà ind'a sirata ; a più grandi prudenza hè torna una volta racumandata.
Sur le même sujet
