Le Direct

Forte hausse du nombre des passagers transportés par les airs en juin

(A redazzioni d'Alta Frequenza) - Crescita di u numaru di parsoni traspurtati ver di a Corsica à u mesi di ghjunghju. I sciffri sò stati publicati nant'à u situ di l'Usservatoriu righjunali di i trasporti. Liendu u marittimu è l'aereu, 837 392 parsoni sò intruti o surtiti da a Corsica, à u mesi di ghjunghju, vali à dì una crescita di 4,7% di pettu à u 2012, quandu 799 567 passaghjeri erani stati arrighjistrati. Hè l'aereu chì apprufitta soprattuttu di ssu fenomenu, cù 383 238 parsoni traspurtati, vali à dì +14% nant'à i ligni francesi, è +20% nant'à i ligni internaziunali. Si custata chì l'aeruporti d'Aiacciu è di Bastia ani apprufittatu à u più di ssa crescita, cù +18% è +21% frà altru. Ind'u marittimu inveci, i sciffri calani di -2,6%. I porti d'Aiacciu, Bastia è Purtivechju sò i più tocchi. Un mesi di ghjunghju chì prumetti bunissimi cosi malgradu tuttu. Ma ci voli à rilativizà quantunqua cù ssi sciffri : boni sciffri di passaghjeri traspurtati ùn volini micca dì di modu sicuru chì l'attività turistica sarà più bona. Da nutà dinò chì u fenomenu di u Ghjiru di Francia spieca forsa ssa crescita forti. S'ellu hè què, ssa crescita saria tandu cà episodica. Da nutà infini chì dipoi u principiu di l'annu, più di 2,5 millioni di parsoni sò stati traspurtati ver di, o da a Corsica.