Football (National) - Le GFCO Ajaccio en Ligue 2 !
(A redazzioni d'Alta Frequenza) - U GFCO Aiacciu ritrova a Lega 2, 19 anni dopu ad avè la lasciata, buschendu si un risultatu à paru 1-1 stasera (vennari) in Épinal, cuncurrenti direttu pà a cullata. Dopu à una reta di Poggi pà l'Aiaccini à a 42a minuta, i lucali ani finalmenti egualizatu à l'ultima siconda. Issu puntu di u risultatu à paru basta malgradu tuttu da renda filici i Diavuli Rossi, Niort è Vannes avendu persu u so scontru, è ùn pudendu più richjappà di fattu u GFCOA. À una ghjurnata di a fini, i ghjucadori di Dumè Veilex sò sicondi cù 66 punti, è quattru unità di più cà u so avversariu di a sera, 4u. Una staghjoni storica pà a squadra aiaccina, chì dopu à una bella epupea in Cuppa di Francia, ritrova dunqua oramai u mondu di u ballò prufessiunali, è a siconda divisioni francesi. A festa duvaria essa tamanta da quì à calchì ora ind'i carrughji d'Aiacciu, da celebrà una cullata aspittata da tuttu un populu. U Gaz chì pruvarà à buscà si u titulu di campionu di Francia di Naziunali a settimana chì veni in Mezavia, pà l'ultimu scontru di l'eserciziu 2011-2012, contr'à Niort.
Sur le même sujet
