Football - National : Belle victoire du CAB
(A redazzioni d'Alta Frequenza) - Pà a 34a ghjurnata di Naziunali, u CA Bastia hà battutu Vannes 2-1. Mentri chì i cabisti aviani largamenti duminatu u primu tempu, sò malgradu tuttu i brittoni chì ani scrittu a prima reta à a fin di issu listessu periudu grazia à l'anzianu ghjucadori di u Sporting Yohan Gomez. Dopu à a pausa, forsa dillusi è distabilizati da issa reta incasciata par surpresa, i bastiacci ani straziatu. Ma era senza cuntà nant'à una falta di u guardianu brittona ind'a so zona, chì parmittia à u CAB d'uttena un penalty trasfurmatu da Pastorelli à a 61a. Una rialisazioni chì hà propiu rilanciatu i corsi, chì sò passati davanti dui minuti dopu cù un bellu tiru di N'Diaye da luntanu. Dopu, i cabisti ani piuttostu bè gistitu u so vantaghju fin'è a fin di a partita. À a classifica, u CAB hè oramai cinquesimu. Ma u più impurtanti hè chì, aldilà di un cuncorsu di circustanzi propiu scemu, u mantenimentu hè acquistatu di modu definitivu dopu à issu scontru, è soprattuttu, i bastiacci sò oramai solu à quattru punnti di u podium cù una partita in iritardu. I cabisti assumani tandu a so voghja d'andà à circà issa pussibilità strasurdinaria, a cullata in Lega 2.
