Football (National) – Beau succès du GFCO Ajaccio face à Vannes (2-1)
(Michaël Andreani – Alta Frequenza) – Bella vittoria di u GFCO Aiacciu nant’à u so tarrenu stasera (sabbatu) contr’à Vannes, dui reti à una, pà l’ondicesima ghjurnata di Naziunali. L’affari erani mali ingaghjati à principiu pà l’aiaccini ; in fatti, à a 38esima minuta, l’anzianu attaccanti di u Sporting Club di Bastia, Christophe Gaffory, avia da signà una reta pà i brittoni. À calchì siconda di u mezu tempu, Quentin Boesso avia da essa sclusu da u cantu di u Gaz, lachendu di colpi i so cumpagni à deci contr’à ondici, pà tuttu u restu di a partita. Dopu à a pausa, i ghjucadori di Dumè Veilex aviani, malgradu tuttu, da truvà i forzi necessarii, da rivena ind’u scontru. À a 50esima minuta, Ibrahim Rachidi avia da iscriva una reta, quilla di l’egualisazioni pà i « Diavuli Rossi ». Iss’ultimi aviani da cuntinuà i so sforzi, fin’è a fini di a partita. Sforzi ricumpensati à deci minuti di u tarmini, Yoan Benyahya signendu a reta di a vittoria. Un successu contr’à unu di i favuriti di issu campiunatu, chì faci assai prò, à u nivellu di i punti ma dinò pà a cunfidenza. L’aiaccini, appiendu ritrovu i valori chì ani fattu a so forza l’ultima staghjoni, sò oramai diciasettesimi, cù deci punti à a classifica.
Sur le même sujet
