Football (Ligue 2) - Un SC Bastia affligeant s'incline à Valenciennes (3-1)
Pà a 22esima ghjurnata llu campiunatu di siconda divisioni, u SC Bastia, com’è di solitu, hà ridatu fiatu à una squadra à a malavia, andendu à perda 3 à 1 contru à Valenciennes, mentri unu scontru più chè pessimu di qualità.
Eppuri, com’è sabbatu contru à Caen, hè u Sporting chì hà marcatu u primu : dopu à ottu minuti di ghjocu, Okou rimittia di capu in a cabbia un calciu di pinalità di Bianchini.
Ma sta volta, ùn ci hè vulsutu à aspittà a siconda parti llu scontru par veda i turchini infangà si.
Fendu un ghjocu dissapitu in tuttu, l’omini di Régis Brouard ani cuncessu un calciu di riparu, ch’iddu missi in a cabbia Jung dopu à 26 minuti : issu ghjucadori, hè un annu ch’iddu ùn avia marcatu !
Dopu à u posu, da infangati ch’iddi erani, i turchini, senza fiatu cullittivu, senza capimachja, ani persu ancu in tuttu a mutivazioni.
Cù a difesa à porti aparti di u Sporting, Jung (à a 53esima minuta) è Knockaert (à l’ora di ghjocu) ani pussutu dà a vittoria à Valenciennes, ch’ùn avia vintu chè una volta in siconda divisioni quist’annu, in fin’d’austu.
I cambiamenta fatti da Régis Brouard ùn n’ani avutu effettu, u cullittivu bastiacciu ùn fendu mai onori à i so culori.
In issu campiunatu, u Sporting hè oramai à i porti lla parti piriculosa lla classifica, cù trè punti d’avanzu à nantu à Annecy, u primu à falà.
À novi ghjorna di u derby, u Sporting pari fiaccu è senza suluzioni.
