Football (Ligue 2) - Chassé-croisé de joueurs au SC Bastia dans la dernière ligne droite du mercato
Ghjovi, à mezanotti, si hà da compia u marcatu d’invernu : u SC Bastia circa à rimpattà quiddu d’istati, fiascatu in tuttu, è l’attaccu d’issu marcatu d’invernu, chì par avali ùn pari cusì famosu !
Yohan Baï si ni movi in Bulgaria, à ghjucà cù u Lokomotiv Plovdiv. In Bastia, ùn hà ghjucatu, fatta fini, chè pochi minuti. Romaric Yapi duvaria da quì à pocu zifrà u so cuntrattu cu a squadra sluvacca di u DAC FC : pocu aprudatu ancu iddu, ùn sarà statu in Bastia chè quattru mesa.
Cù Lienard è Lega, hè u terzu di i ghjucadori ghjunti issa statina à andà si ni. Si circa – ma l’affari ùn hè ancu assicuratu – una porta di isciuta pà Issiar Dramé, u difindidori cintrali, ch’ùn ci hè ghjuntu à fà si piazza.
Par ciò chì tocca à i ghjunti, Tom Meynadier, difindidori à mani dritta, duvaria rimpiazzà à Yapi. Veni da u liveddu Naziunali, ind’iddu hà ghjucatu deci volti, fendu quattru passi dicisivi dipoi l’attaccu lla staghjoni.
Pudaria vultà u difindidori cintrali Mathieu Peybernès : à 33 anni, u ghjucadori di l’Apollon Limassol di Scipru hà ghjucatu in turchinu da u 2013 à u 2017.
Saria in traccia di discorra cù u Sporting, circhendu à ùn fiascà u ritrovu, com’idda hè successa issa statina.
Infini, si dici chì Facinet Conte, u ghjovanu ghjucadori di 18 anni, intarissaria una squadra straniera. Ma, à ciò ch’iddu si senti, u Sporting faria u so trasfirimentu unicamenti cù a pussibilità di veda lu vultà in imprestu à finiscia a so staghjoni chivi.
Sur le même sujet
