Football (Ligue 2) - Alexander Djiku quitte Bastia pour Caen
(A redazzioni d'Alta Frequenza) - L'infurmazioni viaghjava dipoi parechji ori, hè ufficiali oramai. In fatti, u Stade Malherbe de Caen hà annunziatu a ghjunta pà quattru anni di u difensori di u Sporting Club di Bastia, Alexander Djiku. Un trasferimentu chì casca bè à menu di vintiquattru ori di u passaghju di u SC Bastia in appellu davanti a DNCG dopu a so falata amministrativa in Naziunali 1. Dopu i trasferimenti di NGando è Coulibaly, u trasferimentu di u difensori bastiacciu, chì saria inghjiru à dui millioni d'auri, duvaria bastà à u Sporting pà pudè culmà ghjustu ghjustu u so debbitu prima di prisintassi in appellu. Ci pudariani essa torna muvimenti di partenza quantunqua, postu chì u guardianu emblematicu di u Sporting, Jean Louis Leca, hè assai dumandatu da Strasbourg chì hà fattu un'ufferta di trasferimentu à u Sporting, chì pà ssi tempi difficiuli in tarmini finanziari pudaria essa ubligatu à venda unu di i so ghjucadori i più boni.
Sur le même sujet
