Football (Ligue 1) - Yohan Cavalli suspendu trois matchs
(A redazzioni d'Alta Frequenza) - Ghjocu à ballò, Lega 1, a cumissioni di disciplina hà cundannatu di modu siveru l'AC Aiacciu. In fatti, trè ghjucadori sò stati suspesi arisera (ghjovi). Samuel Bouhours è Arnaud Maire, spulsati di manera inghjusta contr'à Auxerre a settimana scorsa, ani presu una partita di suspensioni. A più piccula sanzioni dopu à una carta rossa. Iss'ultimi ùn sarani dunqua micca prisenti dumani (sabbatu) in Cuppa di Francia, ma pudarani ritruvà u so postu ind'u gruppu à partasi di a settimana chì veni, pà u spiazzamentu impurtanti di l'ACA in Valenciennes. Inveci, a cumissioni hè stata sivera contr'à Yohan Cavalli, supesu pà trè scontri, dopu chì a cumissioni appiissi usservatu un gestu spiazzatu da a parti di l'Aiaccinu, duranti a partita Aiacciu-Rennes. A sanzioni ùn pighjarà effettu cà luni. Da issu fattu quì, Yohan Cavalli mancarà i prossimi scontri di campiunatu contr'à Valenciennes è Nizza, eppo l'8i di finali di a Cuppa di Francia, in casu di qualificazioni di l'Aiaccini, o allora u spiazzamentu in Montpellier. Un gattivu colpu pà l'ACA. A squadra pò fà appellu, sappiendu u risicu ch'ella pò inghjinnà : una crescita di a cundanna.
