Football (Ligue 1) - Mickaël Landreau est arrivé à Bastia
(A redazzioni d'Alta Frequenza) - U Sporting Club di Bastia hà compiu l'annata di a più bella manera accugliendu di modu più cà ufficiali u guardianu internaziunali francesi Mickaël Landreau. Quissu quì, senza club dipoi a so partenza di Lille di dicembri, hà firmatu un cuntrattu di sei mesi cù u Sporting, senza uzzioni di rinnovu ma cù a porta quantunqua largamenti aparta à una prulungazioni di cuntrattu s'è tuttu si duvia passà bè. Una scelta spurtiva nanzi tuttu pà u guardianu numaru 3 di a squadra di Francia, chì vedi ind'u Sporting u club ideali pà cunsirvà issu statutu, affari chì saria statu assai di più difficiuli accittendu, par asempiu a chjama di u prestigiosu Inter di Milanu, chì li prupunia ben intesu un cuntrattu più bellu ma un sicondu postu, o quillu di Bruges in Belgica, cù una piazza di titulariu ma ind'un campiunatu menu impurtanti. Malgradu tuttu, Mickaël Landreau ùn duvaria micca pudè principià dumenica contr'à u CA Bastia in Cuppa di Francia, l'omologazioni di u so cuntrattu da a LFP duvendu essa fatta dopu à u passaghju di u Sporting davanti à a DNCG, u 9 di ghjinnaghju.
On écoute Mickaël Landreau.
Sur le même sujet
