Football (Ligue 1) - La LFP homologue Armand-Cesari
(A redazzioni d’Alta Frequenza) - L’eterni derugazioni di u stadiu di Furiani sò oramai un gattivu ricordu. In fatti, a Lega di Ballò Prufessiunali hà omologatu arimani (ghjovi) di modu difinitivu i stallazioni di u stadiu Armand Cesari à u nivellu 1, dumandatu par chì scontri di Lega 1 si ghjuchessini. Un nivellu accurdatu senza prublema da a LFP postu chì ùn ci hè nulla chì ùn và micca, calchì accunciamentu chì manca ùn essendu micca pighjatu in contu inde l’omologazioni. U stadiu t’hà oramai 16 078 piazzi, a tribuna à meziornu 6 339, a nordu 4 560, quilla à punenti 2 699 è quilla à livanti 2 480, 45 piazzi pà i parsoni à mubilità ridutta essendu spartuti frà tutti issi tribuni.
