Football (Ligue 1) - L'ACA battu à Toulouse 2 à 0 ce dimanche
Photo : AC Aiacciu
Duminica dopu meziornu, pà a 17esima ghjurnata llu campiunatu di prima divisioni, l’AC Aiacciu si ni hè mossu à ghjucà in Tulusa.
Supranati bè da i lucali à tempu attaccatu u scontru, l’omini d’Olivier Pantaloni ani incasciatu un marcu di Chaïbi passati undici minuti. Ma dopu cunsultata a videò, ùn hè statu validatu.
Tulusa avaria pussutu binifizià d’un calciu di riparu, parvia d’una mani di Gonzalez, ma soca chì l’arbitru ùn l’avia vista.
Da a parti di l’aiaccini, ùn si hè vistu tanti affari, cacciatu un calciu di Youcef Belaïli mandatu in a piccula reti di fora.
Ghjuntu u posu, u marcu era di 0 à 0.
Ma in a siconda parti llu scontru, Tulusa avia da piddà difinitivamenti a suprana.
À pena ripresa a partita, Ratao mittia u primu marcu. Passata l’ora di ghjocu, Dejaegere ni mittia un sicondu.
Mai l’aiaccini ùn sò stati in capacità di fà calcosa mentri issu scontru.
Malgradu issa disfatta, l’ACA, gramazia à l’altri risultata chì li prufittani, t’hà sempri dui punti d’avanzu à nantu à u primu à falà.