Le Direct

Football (Ligue 1) - L'AC Ajaccio bat Strasbourg dans un match complétement fou (4-2)

Hè à veru una partita scema ch’iddi ani fattu i ghjucadori di l’AC Aiacciu. È una partita mali attaccata d’altrondi chì, subitu subitu, i lucali si piddaiani un marcu di Bellegarde dopu à un calciu di pinalità di Strasbourg, po’ un altru di Gameiro. Ùn erani ancu à passà vinti minuti di ghjocu !

Di capu in a conca, l’Aiaccini aviani à veru bisognu di calchì miraculu.
È fà è fà, dopu ch’iddu achi signalatu una mani l’arbitru, Belaili mittia un calciu di riparu pà i Russi è Bianchi.

Subitu dopu, El Idrissy sciaccaia in a cabbia alsassiana un ballonu datu da Hamouma, mittindu i soi à marcu pattu.

Rinascia tandu a spiranza è, dopu fatta a videò virificazioni, un altru calciu di riparu era cuncessu à l’ACA, ch’iddu marcaia dinò Belaili ! I Russi è Bianchi passaiani tandu davanti à Strasbourg, cù un marcu di 3 à 2.

Po’ Belaili – iddu sempri ! - si ghjucaia di Djiku è facia un beddu centru pà Riad Nouri, chì marcaia di capu.

À u posu, l’AC Aiacciu era davanti, cù un marcu di 4 à 2.

Dopu à u posu, un altru calciu di riparu era datu à l’aiaccini (!), mancatu sta volta da Belaili.

L’ultimu evenimentu di u scontru fù a sclusioni di Vidal.
Cù issa prima vittoria lla staghjoni in casa, l’ACA passa davanti à u so avvirsariu di u ghjornu è ripidda fiatu in a cursa pà u mantinimentu.