Finances de la CTC: un bon rapport de la Chambre régionale des Comptes pour Paul Giacobbi
(A redazzioni d'Alta Frequenza) - I sciffri sò tistardi ! Eccu ciò ch'ellu hà dittu ssu ghjovi Paul Giacobbi duranti una cunfarenza di stampa induv'ellu hà ditagliatu ogni puntu di u raportu di a Camara regiunali di i Conti. Ssu raportu hè un raportu bonu, sicondu u presidenti di l'Esecutivu, è què à u cuntrariu di ciò ch'ellu si senti quì o culà, par via forsa di u cuntestu eletturali. Paul Giacobbi hè vultatu dunqua annant'à i punti essenziali di suddisfazioni ditagliati da a Camara regiunali di i Conti è chì metti in evidenza una gestioni sana di a Cullittività Tarrituriali di Corsica. Cù un debbitu custituitu pà i dui terzi da a mandatura scorsa, a Camara priciseghja chì a neguziazioni nova di l'imprestiti tossichi hà parmissu di fà ecunumii impurtanti, più di 7 millioni d'auri. S'è in u 2009, u numaru di posti à a CTC era di 1285, hè oghji di 1297, ciò chì hè assai luntanu da i sciffri amintati da certi. Soprapiù trovu pà i mezi di cuntinuità tarrituriali, calata di i spesi di funziunamentu, a lista hè longa, ciò chì faci dì à Paul Giacobbi chì ssu raportu hè un mutivu di cuntintezza.
Steti à senta à Paul Giacobbi.
