Finances de la Collectivité de Corse : la majorité territoriale à l'heure des choix pour le groupe Per l'Avvene
(A redazzioni d'Alta Frequenza) - Cunfarenza di stampa di u gruppu d'uppusizioni di diritta Per l'Avvene à l'Assemblea di Corsica, à a vigilia d'una seenza publica nova. L'uccasioni d'amintà parechji sughjetti d'attualità, com'è a visita ministiriali di ssu luni, l'azzioni in cassazioni di a Cullittività di Corsica contr'à a CAPA nant'à l'Uffiziu Publicu di l'Alloghju di Corsica Suttana, l'attitudini di a maghjurità tarriturali inde l'urganisimi liati à a Cullittività, o ancu u cartulari bullenti di u duminiu agriculu di Casabianca, frà altru. U gruppu purtatu da Jean Martin Mondoloni hà fattu dinò un cumentu generali nant'à i finanzi di a CdC, cù un Dibattitu d'Urientazioni Bughjettaria essenziali chì ùn hè ancu à ghjunghja, a vulintà di fà ecunumii da una parti è da un'antra banda certi spesi chì poni essa cunsidarati com'è sprupusitati, com'è un viaghju da quì à calchì ghjornu d'una dilegazioni in Paoli City pà 29 000 auri, d'appressu à Per l'Avvene. A furmazioni di diritta, in u listessu filu, hà missu dinò in evidenza un raportu chì sarà prisintatu ssu marcuri in sissioni, nanzi dunqua à u famosu DOB tant'aspittatu, nant'à l'armunisazioni fiscali trà i dui dipartimenti è sbucchendu nant'à a crescita di l'impositu fundariu in Corsica Suttana. Un Esecutivu inde a cuntinuità di a pulitica dinunziata duranti parechji anni, senza cambiamenti veri, nè mancu segni forti, eccu u sintimu di Per l'Avvene.
Steti à senta à Xavier Lacombe.
