Edouard Philippe en Corse pour installer son mouvement politique Horizons et élargir la majorité présidentielle

edouard philippe, u merri di Le Havre è anzianu primu ministru, hè in visita in Corsica marti è marcuri, à fini d’arradicà ci u so muvimentu, « Horizons ».
A so visita, l’hà iniziata in Bastia, da stallà ci cumitati municipali. Quiddu di Bastia, n’avarà a prisidenza Marie Riolacci. Par quiddu di Lisula, sarà Nicolas Albertini.
In u publicu, si vidiani uni pochi di facci cunnisciuti, ch’ùn erani forsa tutti chivi par adirì à u muvimentu.
Trà quissi, si hè vistu à Julien Morganti, cunsiglieri municipali d’uppusizioni in Bastia, cù uni pochi di i so amichi di u muvimentu « Un futur pour Bastia ».
C’erani dinò i cunsiglieri tarrituriali Jean-Martin Mondoloni è Cathy Cognetti, u merri di Lucciana José Galletti, chì à liveddu lucali hè in simpatia cù « Femu a Corsica ».
Certi merra paisani, com’è Fernand Vincentelli, u merri di a Casabianca, erani prisenti ancu iddi.

U merri di Le Havre conta assicurà, in Corsica quant’è in altrù, i candidaturi à l’alizzioni lighjislativi, da arradicà è allargà a maiurità in ghjiru à emmanuel macron.

Steti à senta à edouard philippe

À torru ad iddu, ci era un sustegnu soiu di sempri, Laurent Marcangeli. U merri d’Aiacciu, chì si vol’dà u tempu d’arradicà u muvimentu « Horizons » in Corsica, ùn hè inchietu par ciò chì tocca à a cuisioni di u gruppu « Un soffiu Novu » à l’assemblea di Corsica. : chivi, a cuabitazioni cù « Les Républicains » s’arremba à intaressi lucali.
Laurent Marcangeli ùn ni chjudi porti, par ciò chì tocca à a prisenza di u muvimentu à i lighjislativi, è si dici incantatu da a candidatura di Julien Morganti in a prima circuscrizzioni llu Cismonti.

Steti à senta u merri d’Aiacciu.

Julien Morganti, chì hà accoltu à édouard philippe à tempu isciutu lla so vittura, hè statu attenti bè à ciò ch’iddu cuntaia. Ma hà quantunca pricisatu ch’iddu ùn ci intria, in u so muvimentu, ancu puri ch’iddu achi dittu ch’iddu purtaia intaressu à a dimarchja d’édouard philippe.
Issa vulintà di tena si à u scartu lli partiti, a spieca cù a so idea d’accodda ghjenti pà a so candidatura à i lighjislativi, ch’iddi sichini di dritta, di manca, o ch’iddu si tratti ancu di certi naziunalisti.
Ancu l’alligria di Laurent Marcangeli ùn a l’hà fatta à fà li cambià via.
Steti à senta à Julien Morganti.