École de Castelluccio : mise en place d'un groupe de travail
Scola di u Castillucciu : a riunioni di marti in mirria d’Aiacciu hè sbuccata à nantu à a missa in anda d’un gruppu di travaddu, da valutà i cundizioni di sicurità.
À issa riunioni c’erani Stéphane Sbraggia u merri, Rose-Maie Ottavy-Sarrola l’aghjunta in carica di l’affari sculari, Charles Dominici u dirittori ginirali di i sirvizia, è i riprisintanti di i parenti d’elevi.
Via un cumunicatu publicatu dopu à issu scontru, a dirizzioni municipali hà dittu chì « sè a quistioni lla chjuditura di u situ à mutivu di sicurità mireta d’essa posta, par avali dicisioni difinitiva ùn ci n’hè.
Partindu da l’elementi d’issu studiu, è in cuncirtazioni sempri cù i parenti d’elevi, hà da essa pussibuli di difinì pricisamenti sè uni pochi d’accunciamenti ani da pudè risolva à bastanza in furia i difficultà signalati, o s’iddu ci hà da vulè à pinsà à chjuda.
A municipalità vurria insiriscia a prublimatica spicifica di u Castillucciu in a riflissioni allargata di a riurganisazioni ginirali di a carta sculara di a cumuna.
Issu travaddu hà par fini di risponda à l’evuluzioni impurtanti di i livedda di fraquintazioni di i 32 scoli sparti à nantu à u tarritoriu aiaccinu issi pochi anni, tinindu à menti l’ughjittivu principali di u middurà i cundizioni di scularisazioni di l’elevi.
Issu sughjettu di primura pà l’avvena di i nosci ziteddi hà da essa in dibattitu in cunsigliu municipali, pà a prima trimisata llu 2024 ».
Sur le même sujet
