Le Direct

Eaux d'Orezza : un protocole d'accord trouvé entre la Collectivité de Corse et les exploitants actuels

Passati calchì sittimani d’imbrogliu, pari schjarì si l’avvena pà l’acqui d’Orezza.

In un cumunicatu, dici l’esecutivu lla Corsica ch’idd’hè stata trova una suluzioni cù a famidda Mora, chì sfrutta a surghjenti chì sò più di vint’anni.

Si farà dunqua una lucazioni è girenza, par quattru anni sicchi.

Issa suluzioni sarà prisintata a sittimana ch’entri à l’Assemblea. Hè privista ch’idda acquisti, a Cullittività, i bè matiriala, di pruduzzioni è u fundariu. A Cullittività, aghjà prupriitaria lla surghjenti è di u fundu di cumerciu, si gudarà cussì u pussessu intigrali di l’arnesu di pruduzzioni.
In u pattu, hè privistu ch’iddu s’impegni, u sociu lla Cullittività, da sustena l’attori publichi è privati lla Castagniccia, masimu quiddi llu sittori culturali è spurtivu, cù 130 000€ pà l’annu 2021, è 100 000€ à u minimu pà l’anni dopu, via cunvinzioni di cullaburazioni.

Dici a CdC ch’iddu hè privistu u mantinimentu di tutti i impiechi, finitu u cuntrattu di lucazioni è girenza, qual’ch’idda sichi a forma ghjuridica à vena pà a sfruttera lla surghjenti. Cù iss’accordu sò arrigulati, à pro di a CdC, i situazioni fundarii è i quistioni di drittu chì ùn erani stati risolti dipoi u 1998, quand’idd’era statu fattu u primu cuntrattu cù u Cunsigliu Ginirali llu Cismonti.