Dossier Alessandri et Ferrandi : la délégation d'élus de la Corse en discussions avec Paris demande l'expression d'une parole politique venant du plus haut de l'Etat

Dopu à cinqui ori di riunioni, è cacciata Corsica Libara, a diligazioni di l’eletti corsi in carica di i niguziati cù parigi hà datu a so pusizioni : hè dumandatu à u statu, à u so più altu liveddu, di lintà una parolla pulitica pà i prighjuneri corsi.

« A diligazioni di l’eletti corsi – prisidenti di l’esecutivu, prisidenti di l’assemblea, prisidenti è riprisintenti lli gruppi, parlamintarii, merra d’Aiacciu è Bastia, prisidenti di i dui associ di i merra – si hè trova issu ghjornu in Aiacciu, à a Cullittività di Corsica.

In un ambienti sullennu è custruttivu, hà fattu l’analisi di a situazioni di tinsioni nata da a dicisioni lla Corti d’Appellu di parigi d’infirmà u ghjudicamentu llu tribunali, chì avia cuncessu à Pierre Alessandri a libartà cundiziunali.

I signatarii d’issa dichjarazioni ani datu validazioni d’issi punti :

- Hè spartuta è ripituta a pusizioni lla cunfarenza lli prisidenti, ch’ùn capisci issa dicisioni inghjusta.
- Si cunsidarighja chì, cuntrariamenti à ciò ch’idda dici a mutivazioni di l’arrestu, hè u mantinimentu in prighjoni di Pierre Alessandri è Alain Ferrandi chì pò purtà disturbu à l’ordini publicu, è micca a pussibilità lla so meza libartà.
- Si rimarca ch’issa mutivazioni, arrimbata solu à l’idea d’ordini publicu, ùn pidda mancu in stampa in contu i nuzioni di dimucrazia, di dialugu è d’appacera, chì sò a primura maestra in Corsica dipoi parichji anni.

- Hè ditta chì dopu à più di 23 anni di prighjunia, a libarazioni d’issu dui omini viaghja in cunfurmità cù u drittu è a ghjustizia, è ch’issa dumanda hè spartuta da a sucità corsa tutta.
- Hè ramintatu ch’issa pusizioni hè stata ditta parichji volti di manera sullenna è unanima da l’assemblea, da u cunsigliu esecutivu lla Corsica, da tanti i merra, da i parlamintarii, è da tanti l’urganisazioni umanitarii, di Corsica o d’altrù.
- Hè cunsidaratu ch’issa dicisioni è i tinsioni ch’idda arreca mettini in piriculu i niguziati trà a Corsica è parigi.
A diligazioni corsa brama di cuntinuvà issi niguziati in cundizioni appaciati, è dumanda dunqua di manera sullenna a sprissioni d’una parolla pulitica à u più altu liveddu llu guvernu è di u statu, chì piddi in contu tutti iss’elementi, di manera ch’iddi poschini ripiddà i niguziati ».