Discussions avec Paris : le difficile équilibre à trouver
Mentri a sissioni di l’assemblea di Corsica, a maiurità è l’uppusizioni ani ripresu à parla di i discursati cù u guvernu.
Gilles Simeoni hà stimatu chì emmanuel macron avia dittu cosi impurtanti è putenti. Eppuri a strada versu un veru statutu pà a Corsica, pinsatu da a maiurità tarrituriali, risica d’ùn essa cusì asatta, hà dittu u prisidenti di l’esecutivu.
Gilles Simeoni hà lampatu una chjama à l’eletti naziunalisti, ch’iddi travaddini insemi. Una invitazioni chì si pudaria fà più larga, accuddindu l’altri forzi pulitichi è forzi vivi.
Steti à senta à Gilles Simeoni.
Sarà pronta l’assemblea pà issu dialugu ? À senta ni à Paul Quastana, a risposta hè : innò !
In un annu, ùn ci hè statu chè una riunioni strutturali di travaddu, hà dittu Paul Quastana.
Hè a stessa critica ch’idda faci Josépha Giacometti. Dici l’eletta di Corsica Libara chì « ùn si niguziighja micca, oghji, quand’iddu si và in parigi. Si và à fighjulà calchì power point ».
L’eletta faci a critica d’un discorsu chì pari più apartu à nantu à a so forma ma chì ùn hè tantu cambiatu, cù sempri issi « punti à ùn francà ».
« Sè vo’ lampeti una chjama à u dibattitu, saremu chivi, ancu puri ch’iddu sichi prufundu u disaccordu è ch’idda sichi alta a difficultà. Mettu quantunca, par principiu, una cundizioni : chì l’affari ùn si faccia contru à l’altri eletti », hà dittu Jean-Christophe Angelini.
Hà pricisatu u prisidenti di u gruppu Avanzemu chì u prucessu avviatu, hè un mezu, è micca una finalità : « A finalità, hè di cambià a vita di l’aienti ».
Pà a maiurità tarrituriali, hè statu più chè chjaru Romain Colonna : « ùn semu micca chivi pà risponda à i dumandi d’emmanuel macron, semu chivi pà risponda à i dumandi di u Populu Corsu ».
Jean-Martin Mondoloni pensa chì l’eletti ùn sò pronti.
« Di marzu, ùn saremu pronti par dì u prughjettu d’autunumia chì no’ vulemu. È ci vurria pò ancu à cunvincia i corsi ».
