Deux bonnes nouvelles concernant les ressources de la CTC
(A redazzioni d'Alta Frequenza) - L’asamini di u prughjettu di legi di finanzi hà parmissu d’andà arisera (luni) in u sensu di i dumandi di l’esecutivu cuncirnendu dui di i risorzi di a Cullittività Tarrituriali di Corsica. Dui amendamenti posti da u ministru Baylet, dopu una discussioni cù l’esecutivu tarrituriali mentri a so ultima visita in Corsica. A prima misura cuncerna u restu di l’inviluppu di cuntinuità tarrituriali. L’esecutivu si ni pudarà ghjuvà pà scopi d’accunciamentu è di sviluppu di i lochi di muntagna, di i stradi par asempiu. Si tratta quì à pocu pressu di 30 millioni d’auri. Postu chì u nivellu di l’inviluppu di cuntinuità tarrituriali ferma custenti, l’ecunumii apprufittarani dunqua à i tarritorii di muntagna. Da un’antra banda, a cuntribuzioni di a Corsica à l’addirizzata di i finanzi publichi hè stata calata par avvicinassi da a media naziunali. A Corsica pagava fin’è oghji di più di pettu à l’altri regioni. A cuntribuzioni di l’isula passa à 3,2 millioni d’auri, inveci di i 7,5 millioni di tandu.
Sur le même sujet
