Des cochons défoncés au cannabis dévorent tout sur leur passage en Alta Rocca
Via un cumunicatu, spieca a prifittura chì a pupulazioni di l’Alta Rocca devi fà casu à uni pochi di purcedda ch’avariani cunsumatu canapu indianu, è chì si parani tuttu ind’iddi passani. Tuccati sò stati Quenza è Livia da issi circa trenta maghjali, ch’avvinghjindu i stradi llu circondu s’ani rumatu una lenza posta à canapu, piatta in a machja.
Da tandu, sò duventi l’animali razza gattivi, è s’attacani à l’aienti. Hè statu ancu mursicatu à i paffi un turistu chì s’era fermu à cambià l’acqua di l’alivi !
Hè statu purtatu à u spidali d’Aiacciu, senza ch’iddu ci sichi piriculu pà a so vita.
Un altru animalu hè intrutu in una casa, ma ùn l’hà ferti à l’abitanti, chì ani chjamatu i ciandarmi : quiddi si sò impignati à scalzà i pedi di canapu è circani oramai à sapè quali l’hà posti chivi.
Cuntattati da i puteri publichi, i sirvizia vitirinarii ani dittu chì l’effettu di a droga duvaria calà toccu u dopu meziornu.
Intantu, meddu saria à fà attinzioni. I sirvizia lla prifittura dumandani à l’abitanti di l’Alta Rocca di stà si ni in casa, è d’ùn avvicinà si à issi purcedda.
