Des cas de bilharziose détectés après baignade en Corse-du-Sud
(A redazzioni d'Alta Frequenza) - Parechji casi aduniti di bilarziosa, una malatia inghjinnata da un varmu prisenti in certi fiumi, sò stati trovi da l'autorità righjunali è naziunali di a saluta à a fin di u mesi scorsu. I parsoni cuncirnati, turisti, si sò tutti bagnati ind'u Cavu, vicinu à Santa Lucia di Purtivechju. Quandu ssi casi sfarenti sò stati cunnisciuti, parechji investigazioni sò stati ingaghjati da l'autorità cumpetenti. L'Altu Cunsighju di a saluta publica hè statu chersu par asempiu pà valutà i risichi. I cunclusioni di tutti i spertizii parmittarani di metta in ballu un pianu d'azzioni nanzi à u principiu di u mumentu duva ci pudaria essa un risicu è di quillu d'andà à bagnà si. A bilarziosa ghjunghji certi volti, calchì ghjornu dopu à l'infezzioni, cù appena di gratta è picculi tacchi rossi annant'à i pedi, prima di dichjarà si in certi casi di manera più impurtanti i sittimani dopu, ancu s'è a maiò parti di u tempu, l'infezzioni ùn pò micca essa rimarcata parchì i segni di a malatia ùn si vedini micca sempri. Una malatia chì ùn si trasmetti micca trà omi, è chì pò essa curata di manera faciuli grazia à un trattamentu efficaci è tularatu una volta chì u diannosticu hè statu fattu. L'Agenza Righjunali di a Saluta, chì voli fà passà parechji missaghji di privenzioni, dici chì par avà, u risicu sanitariu ùn asisti micca, è chì ùn c'hè nisun raghjoni d'essa angusciosi.
Steti à senta u direttori di l'ARS di Corsica, Jean Jacques Coiplet.
