Départementales : réaction de François Casasoprana, défait dans Ajaccio II
(A redazzioni d'Alta Frequenza) - Jean Jacques Panunzi duvaria dorma bè stanotti dopu avè amparatu i risultati di l'alizzioni dipartimintali. A maghjurità di diritta di u cunsighju generali suttanacciu in fatti faci guasgi un parcorsu parfettu ind'un'alizzioni assai particulari chì hà vistu spariscia a mità di i cantoni mentri ch'elli nasciani i famosi duetti, porta bandera di a parità. Avvedaci dunqua i 22 cantoni di Corsica Suttana è saluta à l'urganisazioni cantunali nova è i so 11 unità. Fora di Nathalie Ruggeri, ubligata di fà un sicondu ghjiru par via di una participazioni debbuli, ùn rializeghja micca i 25% di i scritti nicissarii, Jean Jacques Panunzi pudarà avè à u prima ghjiru un'avanza "imperiali". Ottu cantoni sò dighjà par ellu, un 9imu u sarà dumenica chì veni è i dui cantoni chì fermani, l'8 cù Alexandre Sarrola è u 9 cù José Pierre Mozziconacci ùn raprisentani micca pà daveru una manca di i più duri. A diritta aiaccina hà fattu un risultatu tremendu è ripighja u solu cantonu chì li mancava, l'anzianu Aiacciu III ch'ellu t'avia François Casasoprana. Ssu sicondu cantonu d'Aiacciu era u puntu cintrali pà tutti l'usservatori parchì ci si ghjucava u terzu ghjiru di l'alizzioni municipali, ed hè ciò chì s'hè passatu! François Casasoprana hà persu, ed era bellu annarbatu.
Steti à senta à François Casasoprana.
