Crise du centre de Vico : la colère du président du SYVADEC, François Tatti
(A redazzioni d'Alta Frequenza) - U SYVADEC ùn hè micca rispunsevuli di u blucchimi di i so centri. Eccu u missaghju ch'ellu hà mandatu François Tatti duranti una cunfarenza di stampa induva, annarbatu contr'à quilli chì bloccani, ma dinò u Cunsighju Esecutivu è u presidenti di a CAPA, quissu quì hà sceltu d'attaccà com'è strategia di difesa. Cuncirnendu l'azzioni di u cullittivu Pà un Pumonti pulitu, François Tatti hà annunziatu ch'ellu hà fattu inizià una prucedura in u tribunali amministrativu di Bastia pà spulsà quilli chì occupani i lochi, è privedi, s'è a situazioni ùn duvia micca mova nanzi à ssu ghjovi di chjamà, dopu à una cuncertazioni cù l'autorità, à l'ordini pà sbluccà u situ. S'è pà ciò chì tocca i critichi annant'à a mancanza d'anticipazioni ghjunghjendu da a CAPA, François Tatti s'hè cuntintatu simpliciamenti di risponda à Jean Jacques Ferrara, dicendu ch'ellu ùn pudia anticipà l'azzioni di quilli chì bloccani contr'à quali a CAPA ùn hà micca presu pusizioni, d'appressu à ellu, l'attaccu contr'à a nova presidenti di l'Uffiziu di l'Ambienti, Agnès Simonpietri, hè statu di più putenti. Qualifichendu l'appuntamentu trà a presidenti di l'Uffiziu è u cullittivu di salottu, François Tatti hà ghjudicatu di fattu chì ssu cullittivu, è altri, sò i fighjoli di l'azzioni militanti d'Agnès Simonpietri, rispunsevuli d'appressu à ellu, com'è altri militanti di Femu a Corsica, d'avè fattu fiascà prughjetti maiò com'è quillu di Cervioni o l'allarghera di Tallone.
Steti à senta à François Tatti.
