Crise des déchets : la CAB appelle au tri sélectif
(A redazzioni d'Alta Frequenza) - Pà limità i cunsiquenzi di a sarratura di i centri tennichi d'intarru di i rumenzuli di l'isula chì ùn poni più essa riciclati, a Cumunità d’Agglumerazioni di Bastia incuragisci tutti l’abitanti di u tarritoriu à fà u scumpartimentu di manera sistematica.U serviziu di racolta di i rumenzuli spiccati ùn hè micca cuncirnatu in fatti da u blucchimi attuali. I racolti di scumpartimentu sò stati rinfurzati d'altrondi. Ramintemi chì a carta, l’imballasgi è u vetru poni essa posti in i borni o bacchi di scumpartimentu privisti par quissa. In più di ssu dispusitivu, in u centru di Bastia, l’imballasgi poni essa missi inde i sacchi gialli distribuiti di gratisi è posti inghjò di a casa, u marti à sera dopu à 7 ori. I cartoni, l’ughjetti assai maiò, i vegetali, u vetru è l’altri rumenzuli spiciali poni essa posti dinò in u ruminzulaghju di l’Arinella, apartu da u luni à u sabbatu da 7 ori à meziornu è da 2 ori à 5 ori è a dumenica da 8 ori à meziornu. Hè nicissariu d’ùn carcà micca troppu i lochi privisti pà a racolta di i rumenzuli cù altri gennari di rumenzuli chì devini essa scumpartuti. A mubilisazioni in furia di l’abitanti à prò di ssi gesti di scumpartimentu parmittarà di sminuiscia a quantità di rumeunzuli residuali chì devini essa intarrati è parmittarà cusì di privena è di francassi di risichi sanitarii o ambientali. A Cumunità d’Agglumerazioni di Bastia travaghja in cullaburazioni stretta cù tutti i so partenarii pà pudè metta in ballu suluzioni pà cuntena i disturbi inghjinnati da a situazioni attuali.
