COVID-19 : Deux cas de variant Omicron en Corse-du-Sud
Marcuri, l’ARS hè stata infurmata chì dui parsoni in Pumonti erani tocchi da a forma Omicron di u Covid 19.
« Un omu è una ghjuvanetta sò stati virificati pusitivi u 9 di dicembri. U 15 di dicembri, cunfirma hè stata data ch’iddu si trattaia par iddi di u varienti Omicron », hà dittu l’Agenza Righjunali lla Saluta.
Issi dui parsoni parintia ùn n’ani, è nè mancu si parla par iddi di viaghja in i loca à risichi.
Par avali, a saluta di i dui parsoni, pocu sintumatichi è vaccinati, ùn impinsirisci tantu. Sò stati missi à u scartu dipoi u 9 di dicembri.
Trà u 29 di nuvembri è u 5 di dicembri, sò affaccati 2 178 casi novi di Covid, vali à dì 642 di più chè a sittimana innanzi.
Par disgrazia, deci parsoni si ni sò morti parvia llu siscu.
In media, affaccani 311 casi à ghjornu in Corsica.
A incidenza cresci ad ugni età, è ancu a pusitività. I ghjovani di menu di 15 anni issendu tocchi bè, ch’ind’è iddi a incidenza hè à 953 : vali à dì chì un ziteddu par centu hè pusitivu in Corsica, oghji.
Ind’è i 20-29 anni dinò, u sciffru hè altu, chì tocca i 805.
À senta ni à l’ARS, 86 % lli parsoni in rianimazioni ùn sò vaccinati, o sò vaccinati in parti solamenti.
Ad oghji, 56 parsoni sò uspitalizati in Pumonti, è 8 di quissi sò in rianimazioni.
In Cismonti, ci n’hè 46, è 5 di quissi sò in rianimazioni.
A incidenza hè à 582 in Pumonti è à 676 in Cismonti.
A pusitività hè à 5,2 % in Pumonti, è à 6,8 % in Cismonti.