Corsica Ferries présente ses innovations pour l'année 2016
(A redazzioni d'Alta Frequenza) - Mentri chì certi cumpagnii marittimi cuntinueghjani à tazzassi pà ciò chì tocca u serviziu di l'isula, suvvenziunati o micca, altri vogani sottu à celi più clementi. Corsica Ferries hà prisintatu ssu ghjovi da mani in Aiacciu l'innuvazioni missi in ballu pà u principiu di l'annata 2016. Viaghji novi, battelli novi, servizi novi pà i passaghjeri : i battelli gialli cunfirmeghjani più cà mai u so dinamisimu in u sviluppu è l'innuvazioni. À partasi di u mesi di ghjunghju, ci sarà l'apartura di ligni nant'à Purtivechju è a Sardegna cù una leia trà l'isuli. Dui volti à simana da Tulò è trè volti à simana da Nizza, i battelli gialli viaghjarani dunqua pà u meziornu stremu di a Corsica. Porto Torres sarà dinò in leia cù Tulò è Golfo Aranci, vali à dì Olbia, sarà tuccatu da Nizza. Aldilà di a ghjunta di un battellu novu, u Mega Andrea, privista pà i festi di Pasqua, Corsica Ferries annunzia dinò u rinforzu di u serviziu fora di a staghjoni. Pà u portu di Purtivechju, ci sarani dui viaghji in più à simana da Nizza è Tulò, è què fora di a statina, ancu cù un viaghju pà Savona. Corsica Ferries cunfirmeghja dunqua a so piazza di primu traspurtadori di passaghjeri nant'à i viaghji trà u cuntinenti è a Corsica.
Steti à senta à Pierre Mattei, u direttori generali di a cumpagnia.
