Corse-du-Sud : un nageur porté disparu retrouvé en vie
(A redazzioni d'Alta Frequenza) - Un omu di una cinquantina d'anni partutu eri (sabbatu) in principiu di sirata pà nutà in Canella, à u meziornu di A Sulinzara, è sparitu dipoi 10 ori di sera hè statu ritrovu stanotti. I ghjenti chì li sò vicini ani chjamatu i succorsi arisera. Pumpieri, gendarmi, un battellu di a SNSM è un elicotteru di l'armata sò stati mubilizati pà fà i ricerchi. Hè l'elicotteru d'altrondi chì hà trovu l'omu versu un'ora è mezu di mani, chì avia persu cunniscenza. In iputermia avanzata, quissu quì hè statu presu in carica in urghjenza da i succorsi, prima d'essa purtatu à l'uspidali di Bastia. A vittima hà spiecatu dopu ch'ellu hà avutu aggranchi nanzi di perda una palma. Hà riisciutu malgradu tuttu à ghjunghja fin'è u scogliu prima di perda cunniscenza. Si n'hè andatu da l'uspidali ind'a matinata.
