Corse-du-Sud : l'interdiction d'emploi du feu avancée au 12 juin
(A redazzioni d'Alta Frequenza) - Dopu à i dui fochi di u Monti Gozzi è di Bunifaziu ss’ultimi ghjorni, cù una putenza è una vitezza di sparghjera chì dimostrani u statu avanzatu di sicchia di a vegetazioni è un risicu assai altu in Corsica Suttana, u prifettu di u dipartimentu hà presu una misura. Bernard Schmeltz hà dicisu d’avanzà a data d’interdizzioni di fà fochi à u 12 di ghjunghju inveci di u 1a di lugliu ; un arristatu sarà presu in ssu sensu. U raprisintanti di u Statu nant’à l’isula chjama tuttu ognunu à a vigilenza a più maiò è à u rispettu di i sfarenti reguli di securità. Da un’antra banda, cuncirnendu u focu di Bunifaziu, u prifettu faci sapè chì tuttu u lumu sarà fattu nant’à i circustanzi di ssu focu. Un raportu amministrativu hè statu lanciatu da a direzzioni generali di a securità civili è di a gistioni di crisa, mentri chì u prucuratori di a Republica d’Aiacciu hà apartu un’inchiesta ghjudiziaria.
Sur le même sujet
