Coronavirus : les essais de chloroquine autorisés à grande échelle
photo twitter APHM
In a so cunfarenza di stampa, Olivier Véran hà dittu ch’idda si pruvaria in parichji spidala u trattamentu à a cluruchina da luttà contru à u coronavirus.
« Aghju dumandatu ch’iddu sichi ripruduttu u studiu di u prufissori Raoult in altri spidala, cù altri squadri indipindenti. Aghju da essa attenti à veru, attenti bè à iss’affari ».
U prufissori Didier Raoult, chì hè à u cumandu di l’IHU di Marseglia, dici ch’issa midicina paramalaria viaghja bè contru à u Covid 19.
Ma dici u ministru « ch’ùn ci n’hè paesa ad avè datu un’auturisazioni di trattamentu arrimbendu si à unu studiu cumpagnu, postu chì i risultati venini da un studiu apartu fattu à nantu à 24 parsoni, senza placebò.
Hà ancu dittu Olivier Véran : « oghji, ùn aghju dati validati abbastanza scintificamenti, midicalmenti, da avvià mi versu una ricumandazioni, ma aghju fattu di tal’manera chì no’ l’achimi, issi dati, da quì à quindici ghjorna ».
Ramintemu quantunca chì u guvernu si hè sbuciardatu da par iddu, chì à l’urigina, ùn l’avia ricunnisciutu issu studiu, è l’avia ancu missu à u scartu di i primi prutucolli.
