Conseil départemental 2A : nous jugerons sur pièce
(A redazzioni d'Alta Frequenza) - Hè forsa u scotru, ma ùn hè ancu u veranu è pari sempri bellu luntanu l'istati. Hè cusì ch'ellu si pudaria riassuma ssa ghjurnata assai spiciali in u cunsighju dipartimintali di Corsica Suttana. U raportu annant'à u bilanciu di l'attività di u Statu in Corsica è u contu amministrativu 2014 pudariani essa visti guasgi com'è sicundarii di pettu à a tinsioni risintuta duranti ssa riunioni. A ghjurnata era pricinpiata cù una cunfarenza di stampa di Marcel Francisci chì vulia dinunzià l'attitudina di Jean Jacques Panunzi di pettu à u presidenti Luciani. Hà insistutu torna dopu meziornu pà dinunzià "rimprovari mancu appena ghjustificati è falsi, uffesi in u spinu o ancu u Luciani Bashing" è a lista ùn hè micca sana. U presidenti di u cunsighju dipartimintali pumuntincu hà dumandatu, com'è cundizioni à qualsiasi "arragnamentu" futuru scusi publichi, ciò chì hè stata fatta da l'anzianu presidenti. Ma chì i cosi sighini bè chjari : si tratta bè di scusi à Pierre Jean Luciani è micca à u presidenti di u cunsighju dipartimintali parchì Jean Jacques Panunzi ùn hà cacciatu nulla annant'à u fondu di i dichjarazioni chì ani criatu u prublema. Hè bastata quantunqua pà "scutrà" l'ambienti. Pà Jean Jacques Panunzi, l'affari sò chjari : à ondeci contr'à ondeci, hè sicura chì u puteri hè spartutu.
Steti à senta à Jean Jacques Panunzi.
Sur le même sujet
