Communauté d'Agglomération de Bastia : Louis Pozzo di Borgo nouveau président, Ville-di-Pietrabugno tenue à l'écart
Vennari, à u Mantinum in Bastia, Louis Pozzo di Borgo, u primu aghjuntu di Furiani, hè statu elettu prisidenti lla CAB, cù 30 di i 31 voti : Julien Morganti hà vutatu biancu, l’eletti di e Ville di Petrabugnu è di « Unione pè Bastia » ùn ani vutatu micca.
Iss’alizzioni veni à cunsacrà a strada pulitica di l’elettu, cuminciata sei anni fà cù un mandatu d’aghjuntu à u merri di Furiani. Dopu ad avè adiritu à « Femu a Corsica », hè statu cunsiglieri tarrituriali in u 2017, ed hè ancu in carica di u Gran’Situ di a Conca d’Oru.
Dopu un umaghju resu à Gilles Simeoni, hà fattu cunnoscia a so vulintà d’allargà a CAB sinu à u Capicorsu è u Golu.
Steti à senta à Louis Pozzo di Borgo.
I viciprisidenti eletti sò 5 : Pierre Savelli, Guy Armanet, Michel Simonpietri, Marie-Hélène Padovani è Gilles Simeoni. Ma tuttu ùn issendu cusì lindu, ùn ci n’hè viciprisidenti à riprisintà e Ville di Petrabugnu. Pari dunqua ch’idda ci sichi à veru, a rumpitura cù issa cumuna. È ancu s’idda si ferma aparta calchì porta cù una crescita privista lli viciprisidenzi, Michel Rossi, u merri di e Ville, si teni quantunca un pocu d’amarezza.
Pinsendu si scantatu, hà ripresu, contru à a maiurità attuali, u discorsu d’Edmond Simeoni in u 2004 : « Saremu cusì infraquintevuli ? ».
Steti à senta à Michel Rossi.
Jean Zuccarelli, stuzzicatu un pocu da u publicu, hà presu a parolla pà l’uppusizioni. Hà ramintatu ch’idd’era spostu un ricursu pà l’alizzioni di Bastia, è hà fattu sapè ch’ùn li cunvinia tantu, issa dicisioni d’ùn dà a prisidenza lla CAB à un bastiacciu. Hà rimpruvaratu à « Femu a Corsica » di metta a Corsica à u passu, è d’essa un muvimentu cliintillistu.
Steti à senta à Jean Zuccarelli.
