Comité de suivi des fonds européens
(A redazzioni d'Alta Frequenza) - U cumitatu di seguitu di i mezi dati da l'Auropa à a Corsica, o i so raprisintanti piuttostu, sò annant'à l'isula dipoi parechji ghjorni. Una visita chì ùn hè micca solu pà u protocollu parchì si tratta di cuntrullà, da par sè, s'è i prugrammi finanziati à maiò parti da mezi aurupei sò rializati pà daveru è què in cunfurmità cù ciò chì era statu difinitu duranti i cuntrattualisazioni. Pari chì tuttu andessi bè, ancu s'è calchì "ricullata di fatturi" devini essa rializati dinò nanzi à a fin di l'annu, ciò chì parmittarà, quist'annu torna, d'ùn veda micca soldi vultà in Brussels parchì ùn ci ni semi micca ghjuvati. Ci voli à sapè ch'è no semi in ssu mumentu in traccia di compia l'eserciziu 2007-2013 di i mezi aurupei pà u sviluppu righjunali, 284 millioni d'auri ci sò stati cunsacrati, è chì u novu tempu di prugrammazioni, 2014-2020, hè in traccia d'essa discorsa. A Corsica duvia truvà à pocu pressu u listessu nivellu d'ingaghjamentu di a cumunità, o cunnoscia ancu una piccula crescita di i so mezi. Ciò chì spiega l'ottimisimu inghjinnatu da a visita annant'à u tarrenu di ssi spicialisti mandati da Brussels.
Steti à senta à Carsten Rasmussen, rapurtadori generali di a direzzioni generali Regio in Brussels.
Sur le même sujet
