Collectivité unique : l'Assemblée Nationale adopte les ordonnances
(A redazzioni d'Alta Frequenza) - Dopu un fiascu in u Palazzu di u Lussemburgu, a cullittività unica ci l'hà fatta à passà senza difficultà in u Palazzu Bourbon. In fatti, à u cuntrariu di u Senatu, l'Assemblea Naziunali hà aduttatu, à manu alzata, l'urdinanzi rilativi à a Corsica in u quadru di a legi NOTRE. S'è u prucedimentu ùn parmetti micca di sapè cù pricisioni u risultatu di ssu votu, i gruppi Radicali di Manca purtatu da Paul Giacobbi, Partitu Sucialistu è Unioni di i Demucrati è Indipindenti si sò prununziati à prò di ss'urdinanzi à a tribuna nanzi à u votu, com'è u diputatu di strema diritta Jacques Bompard. Ind'è i Republicani, hè u votu contru chì hè statu difesu da Camille de Rocca Serra, Laurent Marcangeli dicendu à titulu parsunali ch'ellu ùn vutaria micca à prò di l'urdinanzi, mentri chì u gruppu cumunistu avia annunziatu anch'ellu un votu contru. U dibattitu, di più sirenu di pettu à quillu in u Senatu, hà ispiratu à u ministru di l'Accunciamentu di u Tarritoriu, di a Ruralità è di i Cullittività Tarrituriali, Jean Michel Baylet, una riazzioni quì dinò di più sirena, postu chì Camille de Rocca Serra è Laurent Marcangeli ani fattu cunnoscia riservi micca nant'à u principiu di a cullittività unica ma nant'à certi punti com'è nant'à a raprisintatività di i tarritorii.
Steti à senta à Jean Michel Baylet.
