Colère du secteur BTP à Portivechju: les précisions du préfet de Corse
(A redazzioni d'Alta Frequenza) - Tuttu què pà què ! Ùn si pò micca dì chì u cumbugliu tamantu urganizatu oghji (vennari) annant’à i stradi di Corsica Suttana è ind’u centru di a cità d’AIacciu da i prufiziunali di a custruzzioni di Purtivechju hà purtatu i so frutti. S’è l’associu di difesa di l’intaressi cullettivi di l’intraprenadori di a custruzzioni hà riisciutu a so uparazioni di sinsibulisazioni, ùn si pò micca dì chì u risultatu hè quì dopu à a mubilisazioni. Partuta da Purtivechju in principiu di matinata, a longa manifestazioni di camiò, d’arnesi d’intrapresa è d’autocars hè ghjunta in Aiacciu versu 11 ori. L’appuntamentu uttenutu ind’è u prifettu di Corsica hà duratu più di dui ori, ma omu s’hè resu contu dopu à una discussioni assai longa chì a situazioni hè bluccata pà daveru. U prifettu di Corsica hà fattu valè l’impussibilità pà u Statu di fà evuluà a situazioni ver di una migliurazioni ; u PLU di Portivechju hè statu annulatu è aspittendu l’elaburazioni di un PLU novu, hè bè u Statu chì devi cuntrullà l’attribuzioni di i parmissi di custruiscia. Christophe Mirmand hè statu più cà chjaru : ùn hè micca u tempu longu di l’amministrazioni prifetturali chì blocca i parmissi di custruiscia. D’appressu à ellu, altri raghjoni sò prisenti dinò, ch’ellu hà vulsutu fà valè.
Steti à senta u prifettu di Corsica.
Sur le même sujet
