Co-officialité : co-désaccord !
(A redazzioni d'Alta Frequenza) - A cuufficialità corsu-francesi ùn hè micca un sughjettu sinsibuli ! Eccu ciò chì hè statu dittu torna da u cunsighju d'amministrazioni di l'Università di Corsica in u cunflittu chì l'upponi à u Statu in u quadru di u rinnovu pà 5 anni di a cunvenzioni tripartita Statu / CTC / Università di Corsica. S'ellu ci pari chì tuttu ognunu pò truvà una suluzioni pà u numaru di posti accurdati, 60 dumandati da l'università, 9 pruposti da u Statu eppo infini 35 ritinuti, u ritiru di una certa parolla da a cunvenzioni hè impurtantissimu pà u Statu. Ssa cunvenzioni faci rifarenza in fatti à a cuufficialità di i dui lingui com'è elementu impurtanti di u prughjettu educativu glubali, ciò chì ùn pò mancu appena essa accittatu da u Statu, com'ellu a ci dici Michel Barat.
Steti à senta u rettori d'Accademia.
