Chutes de neige : encore des routes bloquées !
(A redazzioni d'Alta Frequenza) - U gattivu tempu di iss'ultimi 24 ori in Corsica Suttana hà fattu chì i stradi sò stati taghjati, com'è l'elettricità, soprattuttu inde issi settori di u dipartimentu : Cruzini, settori di Vicu, Arburi frà altru, sittori di Bastelica, Tolla è Ocana. I mezi di a cullettività tarrituriali di Corsica, di u cunsighju ghjinirali è di u serviziu dipartimintali d'incendiu è di succorsu sò mubilizati pà libarà l'accessu à i stradi, caccendu a nevi è l'arburi cascati. I squadri di EDF intarvenini dinò pà lucalizà è riparà i punti tocchi, quandu l'accessu à i stradi a parmittarà. Sicondu i previsioni meteurulogichi, a situazioni firmarà disturbata, malgradu nivati menu impurtanti fin'è dumani matina. U cotru hè aspittatu dumani matina dinò. A più grandi prudenza hè dunqua racumandata.
