Christophe Castaner désavoue le soutien de Jean-Charles Orsucci à la majorité nationaliste
(A redazzioni d'Alta Frequenza) - Christophe Castaner, dilegatu generali di La République en Marche, hà scunfissatu ssa dumenica u sustegnu di Jean Charles Orsucci è di u so gruppu à a risuluzioni chì sarà rimissa à Emmanuel Macron marti o marcuri. U ducumentu vutatu da u gruppu di Jean Charles Orsucci faci rifarenza à a scrizzioni di a Corsica nentru a Custituzioni grazia à i so articuli 74 o 78 è à u minimu u 73. Christophe Castaner ùn ricunnosci più u gruppu "Andà per dumane/La République en Marche" di l'Assemblea di Corsica, ramintendu chì "a sola pusizioni pulitica di LREM (...) hè quilla di u discorsu di u Presidenti di a Republica in Furiani duranti a campagna". Ancu s'ellu si difendi di dà un avertimentu, parchì i sei eletti macrunisti di l'Assemblea di Corsica sò "libari" d'appressu à ellu, hà vulsutu dì quantunqua chì a pusizioni di l'eletti isulani "ùn và micca cù u discorsu di u Presidenti". Da un'antra banda, Christophe Castaner hà sarratu torna parechji porti cuncirnendu i rivindicazioni maiò di l'eletti corsi, ramintendu frà altru chì "a lingua di a Republica, hè u francesi" è chì un statutu fiscali "pà i residenti corsi ùn hè micca una risposta bona". Christophe Castaner era intarrugatu inde l'emissioni "le Grand Jury" di LCI-RTL-Le Figaro.
